1 Аллаһы ихтыяры белән Мәсих Гайсәнең рәсүле булырга чакырылган Паулдан, Состенис имандаштан
2 Мәсих Гайсә аша Аллаһыга багышланган һәм Аның изгеләре булырга чакырылган Көринттәге иман итүчеләр бердәмлегенә һәм һәр урында Раббы Гайсә Мәсихкә мөрәҗәгать итүчеләрнең һәммәсенә сәлам. Мәсих аларның һәм безнең Раббыбыз бит.
3 Атабыз Аллаһы вә Раббы Гайсә Мәсихтән сезгә мәрхәмәт һәм иминлек булсын.
4 Сезнең өчен Аллаһыма һәрвакыт рәхмәт укыйм: Ул Мәсих Гайсә аша сезгә мәрхәмәт бүләк итте.
5 Чөнки Мәсих Гайсәдә сез һәрнәрсәдә: сүздә һәм белемдә баедыгыз,
6 шуның белән Мәсих хакындагы безнең шаһитлек сездә расланды.
7 Шуңа күрә Раббыбыз Гайсә Мәсихнең килүен көткәндә сезнең һичнинди рухи сәләткә мохтаҗлыгыгыз калмады;
8 Раббыбыз Гайсә Мәсих килгән көндә сез гаепсез булсын өчен Аллаһы сезне ахырга кадәр нык тотачак.
9 Сезне Үзенең Улы Раббыбыз Гайсә Мәсих белән аралашу өчен чакырган Аллаһы Үз вәгъдәсенә турылыклы.
10 Имандашлар, Раббыбыз Гайсә Мәсих исеме белән һәм-мәгездән ялварып сорыйм: сез барыгыз да бер сүзле булыгыз, арагызда төрле бүленешләр булмасын, киресенчә, уй-фикерлә-регез бердәм булсын.
11 Имандашларым, сездә ызгыш-талашлар булгалавы турында миңа Хлоя өендәгеләрдән билгеле булды.
12 Мин шуны күздә тотам: сездә «Мин — Паулныкы», «Мин — Апуллусныкы», «Мин — Кифасныкы[1]», «ә Мин — Мәсихнеке» дип сөйләүчеләр бар.
13 Әллә Мәсих бүленгәнме? Паул сезнең өчен хачка кадакландымы әллә? Әллә сез Паул исеме белән суга чумдырылу йоласын үтәдегезме?
14 Аллаһыга шөкер, мин Криспи һәм Гәйдән башка сезнең берегезне дә чумдырмадым.
15 Шуңа күрә беркем дә беркайчан да минем турыда: «Паул үз исеме белән чумдырды», — дип әйтә алмас.
16 Мин шулай ук Эстефәнәс өендәгеләрне чумдырдым; ә тагын кемне дә булса чумдыруымны хәтерләмим.
17 Чөнки Мәсих мине чумдыру өчен түгел, бәлки, Мәсих хачының әһәмияте юкка чыкмасын дип, Яхшы хәбәрне зирәк сүзләр кулланмыйча игълан итәргә җибәрде.
18 Чөнки хач турындагы сүз — һәлакәткә дучар ителгәннәр өчен акылсызлык, ә безнең өчен — Гайсәгә иман итеп котылучылар өчен Аллаһы кодрәте.
19 Изге язмада: «Хикмәт ияләренең зирәклеген юкка чыгарырмын, акыллыларның акылын кире кагармын», — дип язылган.
20 Хикмәт иясе кайда да канунчы кайда? Бу заманның фәлсәфәчеләре кайда? Аллаһы бу дөньяның зирәклеген акылсыз итмәдеме?
21 Чөнки дөнья әле үз зирәклеге аша Аллаһының тирән акылын танып белмәгән вакытта, Аллаһы иман итүчеләрне акылсыз дип саналган Яхшы хәбәр аркылы коткаруны мәгъкуль күрде.
22 Яһүдләр могҗиза таләп итәләр, ә греклар зирәклек эзлиләр;
23 без исә хачка кадакланган Мәсих турында игълан итәбез, ә бу — яһүдләр өчен абыну ташы, греклар өчен — акылсызлык.
24 Ә инде Аллаһы чакырып алганнар өчен, алар яһүдме, яисә грек булсынмы, Мәсих — Аллаһының кодрәте һәм зирәклеге.
25 Чөнки Аллаһы-ның «акылсызлыгы» кешеләрнең зирәклегеннән күпкә зирәгрәк һәм Аллаһының «көчсезлеге» кешеләрнең кодрәтеннән күп өлеш кодрәтлерәк.
26 Имандашлар, исегезгә төшерегез әле, Аллаһы сезне чакырган вакытта сез кем идегез? Сезнең кайберләрегез генә кешеләрнең үз үлчәме буенча акыллы, кодрәтле, беразыгыз гына затлы нәселдән иде.
27 Әмма Аллаһы, акыл ияләренә һәм көч-леләргә оят булсын өчен, дөнья акылсыз һәм көчсез дип исәпләгәннәрне сайлап алды.
28-29 Һичбер кеше Аллаһы алдында мактанмасын дип, дөньяның мөһим саналганнарын юкка чыгару өчен, Ул дөньяның әһәмиятсез дип исәпләнгәннәрен һәм кимсетелгәннәрен сайлап алды.
30 Әмма хәзер Аллаһының гамәле аркылы сез Мәсих Гайсәдә торасыз. Ул — безнең өчен Аллаһыдан килгән зирәклек булды. Гайсә аша без хаклык, изгелек һәм азатлык алабыз.
31 Шулай итеп, Изге язмада язылганча: «Мактанучы кеше Раббы белән мактансын».
1 Имандашлар, яныгызга Аллаһының серен игълан итәргә килгәндә, мин купшы сүзләр сөйләргә яки зирәклегемне күрсәтергә килмәдем.
2 Чөнки сезнең янда булганда мин Гайсә Мәсихтән һәм шуның өстенә Аның хачка кадаклануыннан башка һичнәрсә белмәскә карар кылдым.
3 Мин яныгызга көчсез, бик курыккан һәм калтыранган хәлдә килдем.
4-5 Иманыгыз кешеләр акылына түгел, бәлки Аллаһы кодрәтенә нигезләнсен өчен, сүзем һәм вәгазем кеше акылының ышандырырлык сүзләренә түгел, бәлки Аллаһы Рухының кодрәтен исбатлауга нигезләнгән иде.
6 Ә без инде зирәклек турында җитлеккән иман итүчеләр арасында сөйлибез. Әмма ул — хәзерге заман акылы һәм бу дөнья хакимнәренең акылы түгел, алар бетүгә таба бара бит.
7 Ә без Аллаһының дөнья яратылганчы ук даныбыз өчен билгеләнгән, яшерен серле зирәклеге турында сөйлибез.
8 Шул зирәклекне бу дөньядагы бер генә хаким дә танымады. Әгәр танысалар, данлыклы Раббыны хачка кадакламаган булырлар иде.
9 Әмма Изге язмада болай дип язылган: «Аллаһы Үзен яратучыларга нәрсә әзерләгәнен һичбер күз күрмәгән, һичбер колак ишетмәгән һәм һичбер кешенең йөрәге бу турыда уйлап карамаган».
10 Ә моны Аллаһы безгә Үзенең Рухы аша ачты, чөнки Рух һәрнәрсәне, хәтта Аллаһының тирәнлекләрен дә тикшерә.
11 Кешенең уйларын үзендәге рухтан башка тагын кем белә? Шуның кебек үк, Алла-һының ниятләрен дә Аллаһы Рухыннан башка һичкем белми.
12 Без исә, Аллаһы тарафыннан нәрсә бүләк ителгәнен белү өчен, бу дөньяның рухын түгел, бәлки Аллаһыдан килгән Рухны кабул иттек.
13 Һәм болар турында кеше зирәклеге өйрәткән сүзләр белән түгел, бәлки Рух өйрәткән сүзләр белән сөйләшәбез. Без рухи хакыйкатьне Аллаһы Рухына ия булган кешеләргә аңлатабыз.
14 Үзендә Аллаһы Рухы булмаган кеше Аллаһы Рухы күрсәткәннәрне кабул итми, чөнки аларны акылсызлык дип саный; ул аларны аңлый алмый, чөнки болар турында Изге Рух ярдәме белән генә фикер йөртергә мөмкин.
15 Аллаһы Рухына ия булучы исә һәрнәрсә турында фикер йөртә ала, ә аның үзен һичкем тулысынча аңлый алмый.
16 Чөнки Изге язмада язылганча: «Раббыга киңәш бирергә Аның уй-фикерләренә кем төшенгән?» Ә без Мәсихнең уй-ниятләрен аңлыйбыз, чөнки аларны безгә Изге Рух ача.[2]
1 Имандашлар, мин Аллаһы Рухына ия булучыларга сөйләгән кебек сөйли алмадым, бәлки дөньяви кешеләргә, Мәсих юлында әле дә имчәк баласы кебек булганнарга сөйләгән кебек сөйләдем сезгә.
2 Мин сезгә каты ризык түгел, бәлки сөт ашаттым, чөнки сез ул ризык белән тукланырлык дәрәҗәдә түгел идегез һәм хәзер дә әзер түгелсез.
3 Чөнки сез һаман да дөньяви яшисез. Әгәр бер-берегездән көнләшәсез һәм ызгышып-талашып яшисез икән, бу хәлдә сез дөньяви кешеләр түгелме һәм гади кешеләр кебек эш итмисезме?
4 Чөнки берегез: «Мин — Паулныкы», ә икенчегез: «Мин — Апуллусныкы», — ди икән, ул чакта сез гади кешеләр буласыз түгелме соң?
5 Кем ул Паул? Апуллус кем ул? Алар — хезмәтчеләр генә, һәм Раббы аларның һәрберсенә нинди вазифа бирүенә карап, сез алар аркылы иман китердегез.
6 Мин утырттым, Апуллус су сипте, әмма үстерүен Аллаһы үстерде.
7 Шуңа күрә утыртучы да, су сибүче дә түгел, бәлки үстерүче Аллаһы гына мөһим.
8 Утыртучы белән су сибүче — асылда бер; әмма һәркайсы савабын үзенең хезмәтенә карап алачак.
9 Чөнки без — Аллаһының хезмәттәшләре, ә сез — Аллаһының иген кыры, Аллаһының корылмасы.
10 Зирәк төзүче кебек, Аллаһы мәрхәмәте белән, мин нигез салдым, ә башка берәү шуның өстенә төзи. Әмма һәркем үзенең төзү рәвешенә игътибар итсен.
11 Чөнки булган нигездән башка бүтән нигезне һичкем сала алмый, ә ул нигез — Гайсә Мәсих.
12 Кем дә булса бу нигез өстенә алтыннан, көмештән, асылташлардан, агачтан, печәннән, саламнан төзесә,
13 һәрбе-ренең эше ачык күренәчәк; ул эшне исә хөкем көне белдерәчәк. Ул көн ут белән ачылачак, һәм ут һәркемнең эшен сынаячак.
14 Кемнең корылмасы исән калса, шул савап алачак.
15 Эшләгән эше янса, ул зыян күрәчәк. Хәер, ул үзе котылып калачак, әмма ут эченнән чыккан кебек котылачак.
16 Әллә Аллаһы йорты булуыгызны һәм сездә Аллаһы Рухы яшәвен белмисезме?
17 Кем Аллаһының йортын җимерсә, Алла-һы аны җәзалаячак. Чөнки Аллаһы йорты изге; ә ул йорт — сез.
18 Берегез дә үзен-үзе алдамасын. Кайберегез бу заманда үзен акыл иясе дип санаса, акыл иясе булу өчен, ул акылсыз булсын.
19 Бу заманның акыллылыгы — Аллаһы каршында акылсызлык бит. Чөнки Изге язмада: «Аллаһы акыл ияләрен мәкерләрендә эләктереп ала», — дип язылган бит.
20 Һәм тагын: «Раббы акыл ияләренең уйларын белә: алар файдасыз».
21 Шулай булгач, һичкем кешеләр белән мактанмасын, чөнки һәрнәрсә — сезнеке.
22 Паулмы, Апуллусмы, Кифасмы, дөньямы, тормышмы, үлемме, хәзергеме яки киләчәкме — һәммәсе сезнеке;
23 сез исә — Мәсихнеке, ә Мәсих — Аллаһыныкы.
1 Шулай итеп, безне һәркем Мәсихнең хезмәтчеләре һәм Аллаһы серләре ышанып тапшырылган идарә итүчеләр дип санасын.
2 Моннан тыш ышанып тапшырылганнарның һәрберсенең тугры булуы таләп ителә.
3 Сезнең яки башкаларның минем хакта хөкем йөртү рәвеше әһәмиятле түгел; мин үзем дә үзем турында хөкем йөртмим.
4 Ләкин, үземдә бернинди гаеп күрмәсәм дә, моның белән үземне акламыйм. Мине бер Раббы гына хөкем итә.
5 Шуңа күрә, Раббы килгәнче берничек тә хөкем итмәгез. Ул караңгылыкта яшерелгәннәрне яктыртачак һәм эчкерсез ниятләрне күрсәтәчәк, һәм шул чакта һәркемгә Аллаһыдан мактау булачак.
6 Имандашлар, сезнең хакка мин боларны үземә һәм Апул-луска карата кулландым. Изге язмада язылганнан тыш акыл сатмаска өйрәнүегезне телим, һәм һичкем берәүне башка берәү алдында мактап өстен куймасын.
7 Сине кем өстен итеп куя? Син кабул итмәгән берәр нәрсә бармы? Ә инде кабул иткәнсең икән, ни өчен кабул итмәгән кебек мактанасың?
8 Сез инде тукландыгыз, сез инде баедыгыз, сез инде бездән башка патшалар булдыгыз! Мин, чыннан да, патшалар булуыгызны теләр идем, шул вакытта без дә сезнең белән бергә патшалар булыр идек!
9 Ә миңа Аллаһы безне, рәсүлләрне, үлемгә хөкем ителгән кешеләр кебек, иң артка куйган сыман тоела. Чөнки Аллаһы безне дөнья, фәрештәләр һәм кешеләр өчен тамаша итте.
10 Без — Мәсих хакына тилеләр, сез исә — Мәсих белән берләшүдә акыллылар! Без — хәлсезләр, ә сез — көч-леләр! Сезне хөрмәтлиләр, ә безне хурлыйлар.
11 Хәтта, әлегә кадәр ачлыкка һәм сусауга дучарбыз, ярым ялангач һәм кыйналган хәлдә, бер урыннан икенче урынга күченеп йөрибез, чөнки йорт-җиребез юк.
12 Һәм үз кулларыбыз белән авыр хезмәт башкарып көн күрәбез. Безгә ләгънәт укыйлар — без фатиха бирәбез; безне эзәрлеклиләр — без түзәбез.
13 Безгә яла ягалар — без яхшылык белән җавап бирәбез. Дөнья өчен әлегә кадәр барысы тарафыннан санга саналмаган чүп-чар кебек булдык без.
14 Мин боларны сезне оялту өчен язмыйм, әмма яраткан балаларымны кисәткән сыман кисәтәм.
15 Гәрчә Мәсих юлында меңләгән нәсыйхәтчеләрегез булса да, аталарыгыз күп түгел. Яхшы хәбәр белдереп, Мәсих Гайсә аша мин сезнең рухи атагыз булдым.
16 Шуңа күрә ялварып сорыйм: миннән үрнәк алыгыз.
17 Шуның өчен мин сезгә үземнең сөекле һәм Раббыга турылыклы улым Тимутене җибәрдем. Ул Мәсих Гайсәгә ияреп тормыш итүем һәм һәр җирдә һәрбер иман итүчеләр бердәмлегендәге өйрәтүләрем турында сезнең исегезгә төшерер.
18 Мин яныгызга килмәс дип, сезнең кайберләрегез масайган.
19 Әмма, Аллаһы насыйп итсә, мин тиздән сезгә килермен һәм әлеге масаючыларның сүзен түгел, бәлки көчен сынап белермен.
20 Чөнки Аллаһы Патшалыгы сүздә түгел, бәлки көчтә.
21 Нәрсә телисез сез? Сезгә таяк беләнме яисә мәхәббәт һәм басынкылык рухы белән килимме?
1 Дөрестән дә, арагызда фәхешлек, хәтта мәҗүсиләрдә дә булмаган фәхешлек урын алуы турында хәбәрләр бар. Кемдер үги анасын үзенә хатын иткән икән.
2 Ә сез, елыйсы урында, тагын да тәкәбберләнгәнсез! Андый эш кылучыны арагыздан сөрергә кирәк иде.
3 Ә мин тәнем белән түгел, күңелем белән яныгызда булганда, андый эш эшләүчене арагызда булган кебек хөкем иттем:
4 сез Раббыбыз Гайсә исеме белән җыелганда һәм күңелем сезнең белән булганда, Раббыбыз Гай-сә кодрәте белән бергә,
5 Раббыбыз көнендә аның рухы котылсын дип, тәнен юкка чыгару өчен бу кешене шайтан кулына тапшырырга кирәк.
6 Сезнең өчен мактанырлык һичнәрсә юк. Кечкенә генә ачыткының да бөтен камырны ачытуын белмисезме әллә?
7 Шулай булгач, яңа төче камыр буласыгыз килсә, иске ачыткыны ташлагыз. Чынлыкта сездә инде ачыткы юк, чөнки Коткарылу бәйрәме бәрәнебез булган Мәсих безнең өчен корбан ителде.
8 Шуңа күрә иске ачыткы белән — усаллык һәм мәкерлек ачыткысы белән түгел, бәлки ачыткысыз сафлык һәм хакыйкать икмәге белән бәйрәм итик.
9 Мин сезгә хатымда, фәхеш кешеләр белән аралашмагыз, дип язган идем.
10 Хәер, дөньядагы фәхеш кешеләр яки комсызлар, талаучылар, потка табынучылар белән аралашмагыз дияргә уйламадым, юкса бу дөньядан китәргә тиеш булыр идегез.
11 Үзен имандаш дип атап та, фәхеш яки комсыз, потка табынучы яки яман телле, эчкече яки талаучы булып кала бирүче белән аралашмагыз, хәтта андый кеше белән бергә ашамагыз да, дип яздым мин сезгә.
12 Ник миңа иман итүчеләрдән читтә булганнарны хөкем итәргә? Арагыздагыларны сез үзегез хөкем итәргә тиеш түгелме соң?
13 Читтә булганнарны исә Аллаһы хөкем итә. Шулай итеп, Изге язмада язылганча: «Үз арагыздан яманлык кылучыны сөрегез!»
1 Арагыздагы башка берәүгә дәгъвасы булган кеше, изгеләр алдында түгел, бәлки имансызлар алдында хөкем ителергә ничек батырчылык итәр икән?
2 Дөньяны изгеләр хөкем итәчәген белмисезме әллә? Әгәр дөньяны сез хөкем итәсез икән, ул вакытта сез әһәмиятсез эшләрне хөкем итә алмассызмы?
3 Фәрештәләрне хөкем итәчәгебезне белмисезме әллә? Көндәлек дәгъваларны хөкем итәргә сәләтебез җитмәсме?
4 Ә көндәлек дәгъваларны хәл итәргә кирәк булганда сез имансызларны хакимнәр итеп куясызмы?
5 Сезгә оят булсын дип әйтәм: әллә имандашлары арасындагы бәхәсләрне хәл итәрлек бер генә акыллы кешегез дә юкмы?
6 Имандаш белән имандаш дәгъвалаша, өстәвенә, бу — имансызлар алдында эшләнелә!
7 Бер-берегез арасында дәгъвалар булуы инде үзе үк сезнең ту-лысынча җиңелүегезне күрсәтә. Сезгә ни өчен рәнҗетелгәннәр һәм алданганнар булып калмаска?
8 Әмма сез үзегез рәнҗетәсез һәм имандашларыгызны алдыйсыз.
9 Явызлык кылучыларның Аллаһы Патшалыгына ия була алмаячакларын белмисезме әллә? Алданмагыз: азгыннар, потка табынучылар, зиначылар, җенси бозыклыкка бирелгәннәр, бер-берсе белән җенси мөнәсәбәткә керүче ирләр,
10 караклар, комсызлар, эчкечеләр, яман теллеләр, талаучылар — берсе дә Аллаһы Патшалыгына ия була алмаячаклар.
11 Кайберләрегез менә шундый иде. Әмма Раббыбыз Гайсә Мәсих исеме һәм Аллаһыбыз Рухы белән юылып чистарындыгыз, изге ителдегез һәм Аллаһы тарафыннан акландыгыз.
12 Миңа бар нәрсә рөхсәт ителә, әмма һәммә нәрсә дә файдалы түгел. Һәммә нәрсә миңа рөхсәт ителә, әмма минем өстән бернәрсә дә хакимлек итмәскә тиеш.
13 Ризык — карын өчен, карын — ризык өчен, әмма Аллаһы анысын да, монысын да юк итәчәк. Тән исә фәхешлек өчен түгел, бәлки Раббы өчен, һәм Раббы тән өчен була.
14 Аллаһы Раббы Гайсәне үледән терелтте һәм Үзенең кодрәте белән безне дә терелтәчәк.
15 Әллә сез белмисезме, тәннәрегез — Мәсихнең әгъзалары бит? Шулай булгач, әллә миңа, Мәсихнең әгъзаларын алып, аларны фахишә әгъзалары итәргәме? Һич тә булмас!
16 Әллә фахишә белән кушылучының аның белән бер тән булуын да белмисезме? Чөнки Изге язмада: «Икесе дә бер тән булыр», — дип язылган.
17 Ә инде Раббы белән кушылучы Аның белән рухи яктан бер була.
18 Фәхешлектән качыгыз! Кеше эшләгән һәр гөнаһ тәннән читтә була, ә фәхешлек итүче үз тәненә каршы гөнаһ кыла.
19 Сезнең тәнегез — Изге Рухның йорты. Изге Рух сезгә Алла-һы тарафыннан бирелде һәм сездә яши. Әллә сез моны белмисезме? Һәм сез дә үзегезнеке түгел.
20 Чөнки сез кыйбат хакка сатып алындыгыз. Шуңа күрә тәнегез белән Аллаһыны данлагыз.
1 Инде миңа язганнарыгызга килгәндә, ир кешенең хатын-кыз белән җенси мөнәсәбәткә кермәве яхшы,
2 әмма, фәхешлек булмасын өчен, һәр ирнең үз хатыны һәм һәр хатынның үз ире булсын.
3 Ир — хатынына, ә хатын иренә карата үз бурычын үтәсен.
4 Хатын үз тәненә үзе хуҗа түгел, ире хуҗа; шуның кебек, ир дә үз тәненә үзе хуҗа түгел, бәлки хатыны хуҗа.
5 Дога кылу өчен билгеләнгән вакытка читләшүне исәпкә алмаганда, ике якның да ризалыгыннан башка бер-берегездән читләшмәгез. Аннан соң тагын бергә кушылыгыз. Шулай итеп, шайтан, тотнаксызлыгыгыздан файдаланып, сезне аздыра алмас.
6 Хәер, моны әмер итеп түгел, бәлки ташлама ясап әйтәм.
7 Чөнки бар кешеләрнең дә минем кебек булуларын телим. Әмма һәркемнең Аллаһыдан бирелгән сәләте бар: берәүнең мондый, ә икенче берәүнең башка төрле.
8 Никахта тормаганнарга һәм тол хатыннарга әйтәм: аларга минем кебек калу яхшырак булыр.
9 Әмма инде түзә алмасалар, өйләнсеннәр яки кияүгә чыксыннар. Чөнки җенси дәрт белән януга караганда, өйләнү яки кияүгә чыгу яхшырак.
10 Ә инде өйләнгәннәргә һәм кияүдәгеләргә мин түгел, Раббы әмер итә: хатын иреннән аерылмасын.
11 Әгәр аерыла икән, ул чакта ирсез торсын яки үз ире белән яңадан килешсен. Ир дә үз хатынын ташламасын.
12 Ә башкаларга, Раббы түгел, мин әйтәм: әгәр берәр иманда-шыңның иман итмәүче хатыны булса һәм хатын аның белән яшәргә риза икән, ир аны ташламаска тиеш.
13 Берәр хатынның ире иман итми икән һәм ир аның белән яшәргә риза булса, хатын аны ташламаска тиеш.
14 Чөнки иман итмәүче ир иманлы хатын аша һәм иман итмәүче хатын иманлы ир аша изге ителә. Югыйсә сезнең балаларыгыз саф булмас иде; ә болай изге булалар.
15 Иман итмәүче аерылырга теләсә, аерылсын. Мондый хәлдә иман итүче ир яки хатын-кыз бер-беренә бәйләнмәгәннәр. Аллаһы безне имин яшәргә чакырды.
16 Әй син, хатын, иреңне коткара алмаячагыңны каян беләсең? Яки, әй син, ир, хатыныңны коткара алмаячагыңны каян беләсең?
17һәркем Раббы билгеләгәнчә һәм Аллаһы чакырганча яшәсен. Барлык иман итүчеләр бердәмлекләренә минем күрсәтмәм шундый.
18 Сөннәтле берәү Аллаһыга чакырылган икән, сөннәтле булуын юк итмәсен. Аллаһыга сөннәтсез чакырылган икән, сөннәтсез булып кала бирсен.
19 Сөннәт тә, сөннәтле булмау да бернәрсә түгел, бәлки Аллаһы әмерләрен үтәү генә мөһим.
20 һәркем Аллаһыга чакырылганда нинди хәлдә булса, шулай кала бирсен.
21 Аллаһыга чакырылганда син кол идеңме? Бу сине борчымасын, әмма азат була алсаң, бу мөмкинлектән файдалануың яхшырак.[3] 22 Чөнки Раббы тарафыннан чакырылган кол — Аның ирекле кешесе. Ә хөр хәлдә чакырылган кеше — Мәсихнең колы.
23 Сез кыйбат хакка сатып алындыгыз, шуңа күрә кешеләрнең коллары булмагыз.
24 Имандашлар, Аллаһыга нинди хәлдә чакырылган булсагыз, шул хәлдә калыгыз.
25Никахка кермәгәннәргә карата Раббыдан әмерем юк, фәкать, Раббының мәрхәмәте белән Аңа турылыклы буларак, киңәш бирәм.
26 Хәзерге заманның авыр шартларын истә тотып, кеше нинди хәлдә булса, аңа шул хәлдә калу яхшырак дип исәплим.
27 Син хатын белән кушылдыңмы? Аерылу турында уйлама. Хатынсыз калдыңмы? Хатын эзләмә.
28 Хәер, өйләнсәң дә, гөнаһ кылмассың. Кыз кеше дә, кияүгә чыга икән, гөнаһ кылмас. Әмма андыйларның бу тормышта мәшәкатьләре күп булачак. Ә мин сезне бу мәшәкатьләрдән саклап калырга телим.
29 Имандашлар, сезгә шуны әйтәм: вакыт инде аз, моннан ары хатынлылар хатынсыз кебек,
30 елаучылар еламаучылар кебек, шатланучылар шатланмаучылар кебек, сатып алучылар сатып алмаучылар кебек,
31 бу дөнья белән файдаланучылар файдаланмаучылар кебек булсыннар. Чөнки бу дөньяның хәзерге рәвеше үтеп бара.
32 Ә мин сезнең мәшәкатьсез яшәвегезне телим. Өйләнмәгәнкеше, Раббыга ярарга дип, Аның эшләре хакында мәшәкатьләнә,
33 ә өйләнгән кеше хатынына ярарга тырыша, дөньяви эшләр турында кайгырта һәм аның игътибары төрле якка юнәлә.
34 Кияүгә чыкмаган кыз яки гыйффәтле кыз, тәнем һәм рухым белән изге булыйм дип, Раббы турында борчыла, ә инде кияүгә чыккан хатын иренә ярарга тырыша, дөньяви эшләр турында кайгырта.
35 Мин моны богау салу өчен түгел, бәлки Раббы өчен әдәпле рәвештә, чын күңелдән бирелеп, игътибарыгызны читкә юнәлтмичә яшәвегезне теләп, сезнең файдага сөйлим.
36 Әгәр берәү үз кызының инде яше җитеп тә кияүгә чыкмый калуын килешсез дип исәпләсә, теләгәнен кылсын — гөнаһ булмас. Алар өйләнешсеннәр.
37 Күңеле белән какшамыйча нык торып, һичнинди кысынкылык сизмичә, үз ихтыярын кулында тотып тора алган кеше кызын кияүгә бирмичә үз янында тотарга күңеленнән карар итә икән, ул яхшы эшли.
38 Шунлыктан, кызын кияүгә бирүче яхшы эшли, ә инде кияүгә бирмәүче тагын да яхшырак эшли.[4] 39 Ире исән чакта хатын аңа бәйле. Ире үлгәч, кемгә теләсә, шуңа кияүгә чыгарга ирекле, әмма Раббыга иман итүчегә генә.
40 Әмма кияүгә чыкмаса, хатын бәхетлерәк була. Мин шулай уйлыйм, Изге Рух та миңа киңәш бирә дип саныйм.
37 Күңеле белән какшамыйча нык торып, һичнинди кысынкылык сизмичә, үз ихтыярын кулында тотып тора алган кеше кәләшенең сафлыгын сакларга күңеленнән карар итә икән, ул яхшы эшли.
38 Шунлыктан, кәләше белән никахланучы яхшы эшли, ә өйләнмәүче тагын да яхшырак эшли».
1Потларга корбан ителгән ризык турында һәммәбез беләбез, чөнки белемебез бар. Ләкин белем тәкәбберләндерә, ә мәхәббәт көч бирә.
2Кем дә кем нәрсәдер беләм дип уйлый икән, ул әле тиешенчә белми.
3Аллаһыны яратучы исә Аның тарафыннан таныла.
4Шулай итеп, потларга корбан ителгән ризыкларны ашауга килгәндә, без шуны беләбез: потлар дөньяда бернәрсә түгел, һәм Аллаһыдан башка илаһ юк.
5Чөнки җирдә яисә күктә илаһ-лар дип аталганнар булса да (чыннан да, күп «илаһлар» һәм күп «хуҗалар» бар),
6безнең бер генә Аллаһы Атабыз бар. Бөтен нәрсә — Аңардан, һәм без Аның өчен яшибез. Бер Раббы — Гайсә Мәсих бар, һәрнәрсә Аның аркылы булды һәм без Аның аша яшибез.
7Әмма барлык кешеләрдә дә андый белем юк. Потларны таныганлыктан, корбан ителгән ризыкны потка табыну дип санап ашаганга, кайберәүләрнең зәгыйфь вөҗданнары пычрана.
8Ризык безне Аллаһыга якынайтмый, чөнки ашап без һичнәрсә казанмыйбыз, ашамыйча да һичнәрсә югалтмыйбыз.
9Әмма сак булыгыз: бу хөрлегегез иманы зәгыйфь булганнарны вәсвәсәгә төшерергә сәбәп булмасын.
10Чөнки иманы зәгыйфь булган берәү сине, белемлене, потханәдә өстәл артында утырганда күрсә, потларга корбан ителгән ризыкны ашарга ярый икән, дип уйламасмы?
11Синең белемең бу зәгыйфь имандашыңны һәлак итәр. Мәсих шундый кеше өчен дә үлде бит.
12Имандашларга карата шул рәвешчә гөнаһ кылуыгыз һәм аларның зәгыйфь вөҗданын яралавыгыз белән сез Мәсихкә карата да гөнаһ кыласыз.
13Менә шуңа күрә мин ашаган ризык имандашымны вәсвәсәгә төшерергә сәбәпче булса, аны вәсвә-сәләндермәү өчен һичкайчан ит ашамам.
1 Мин хөр түгелмени? Мин әллә рәсүл түгелме? Мин Раббы-быз Гайсәне күрмәдемме әллә? Сез — Раббы миңа тапшырган хезмәтемнең җимеше түгелмени?
2 Әгәр башкаларга рәсүл түгелмен икән, сезнең өчен — рәсүл, чөнки Раббы белән берләшкән булуыгыз — минем рәсүллегемә дәлил.
3 Мине гаепләүчеләргә каршы шулай җавап бирәм.
4 Әллә безнең ашарга һәм эчәргә хакыбыз юкмы?
5 Яки башка рәсүлләр, Раббының энеләре һәм Кифас кебек, иманлы хатыныбызны үзебез белән сәяхәткә алырга хакыбыз юкмы?
6 Яисә бары Барнабның һәм минем генә гомер итү өчен эшләмәскә хакыбыз юкмы?
7 Кайчан да булса кем үз хисабына гаскәри булып хезмәт итә? Йөзем бакчасы утырткан кеше аның җимешләрен ашамас микән? Кемдер көтү көтеп тә үзе көткән көтүнең сөтен эчмәс микән?
8 Мин боларны кеше уйлаганча гына сөйлимме? Канун да шул хакта сөйли түгелме соң?
9 Муса канунында: «Ашлык сугучы үгезнең авызын томалама», — дип язылган бит. Әллә Аллаһы үгезләр хакында кайгыртамы?
10 Муса кануны безнең өчен сөйләмимени? Әйе, бу безнең өчен язылган, чөнки сөрүче, уңыштан үз өлешемне алырмын, дигән өмет белән сөрергә тиеш, ашлык сугучы да шундый ук өмет белән сугарга тиеш.
11 Арагызда рухи орлык чәчкәнбез икән, сездән матди уңыш алырга хакыбыз юкмы? Әллә бу бик күпме?
12 Әгәр башкаларның сездән ярдәм алырга хокукы бар икән, безнең хокукыбыз тагын да күбрәк түгелме соң? Әмма без бу хокуктан файдаланмадык, бәлки, Мәсих турындагы Яхшы хәбәргә комачауламас өчен, бар нәрсәгә түзәбез.
13 Аллаһы Йортында эшләүчеләрнең Аллаһы Йортыннан туклануларын белмисезме әллә? Яки корбан китерү урынында хезмәт итүчеләрнең шунда китерелгән корбаннардан өлеш алуларын белмисезме?
14 Шуның кебек үк Раббы да Яхшы хәбәрне игълан итүчеләргә әлеге хезмәт хисабына көн күрергә әмер бирде.
15 Әмма мин үзем бу хокукларның берсеннән дә файдаланмадым. Һәм бу сүзләрне сездән ярдәм көтеп язмыйм. Чөнки мактанычымны кемнең дә булса юкка чыгаруына караганда, минем өчен үлем яхшырак.
16 Мин Яхшы хәбәр игълан итәм икән, мактанырлык бернәрсә юк, чөнки бу — минем тиешле вазифам. Әгәр Яхшы хәбәр таратудан туктасам, башкаема кай-гы-хәсрәт килсен!
17 Моны үз теләгем белән эшләсәм, савабы булачак; әгәр үз ихтыярым белән эшләмәсәм, мин бары үземә ышанып тапшырылган хезмәтне башкарам.
18 Минем өчен савап нинди булачак? Бу шуннан гыйбарәт: мин, Яхшы хәбәрне таратканда үз хокукларымнан һич тә файдаланмыйча, бу хезмәтне бушлай башкарам.
19 Чөнки, барсыннан хөр булсам да, тагын да күбрәк кешене Аллаһыга китерү өчен, мин һәммәсенә кол булдым.
20 Яһүдләр-не Аллаһыга китерү өчен, аларга яһүд кебек булдым; Муса канунын тотучыларны Аллаһыга китерү өчен, үзем канун астында булмасам да, алар алдында канун астындагы кебек булдым.
21 Муса канунын белмәгәннәрне Аллаһыга китерү өчен, алар алдында канунны белмәүче кебек булдым. Әлбәттә, бу — мин Аллаһы канунын тотмыйм дигән сүз түгел, киресенчә, мин Мәсих канунына буйсынам.
22 Зәгыйфьләрне Аллаһыга китерим дип, зәгыйфьләргә зәгыйфь кебек булдым. Ничек кенә булмасын, кайберләрен генә булса да коткарыйм дип, мин барысына үзләре кебек булдым.
23 Яхшы хәбәрнең фатихаларын уртаклашу өчен, мин боларның һәммәсен Яхшы хәбәр бәрабәренә эшлим.
24 Ярыш мәйданында йөгерүчеләрнең һәммәсенең йөгерүен, әмма бүләкне берсенең генә алуын белмисезме әллә? Шулай булгач, бүләк алу өчен йөгерегез!
25 Ярышучыларның барысы да ярышка бик нык әзерләнәләр. Алар моны фани таҗ алу өчен эшлиләр, ә без фани булмаган таҗ алу өчен эшлибез.
26 Шуның өчен дә мин максатсыз йөгергән кеше кебек йөгермәм, буш һавага сугучы кебек көрәшмәм.
27 Әмма башкаларга игълан итеп, үзем савап алу хокукыннан мәхрүм калмас өчен, тәнемне чыныктырам һәм аны үз ихтыярыма буйсындырам.
1 Имандашлар, ата-бабаларыгыз белән булган хәлләрне белми калуыгызны теләмим. Болыт астында торганда аларның барысын да Аллаһы саклады, алар һәммәсе дә Кызыл диңгез аша коры җир буйлап чыктылар.
2 Һәммәсенең болыт астында торулары һәм диңгез аша чыгулары алар өчен Муса өммәтенә чумдырылу булды.
3 Һәммәсе дә күктән җибәрелгән бер үк ризыкны ашады.
4 Һәммәсе дә үзләре белән йөргән рухи кыя таштан күктән җибәрелгән бертөрле эчемлекне эчте; бу кыя таш исә — Мәсих Үзе.
5 Хәер, аларның күпчелеге Аллаһыга яраклы булмады һәм чүлдә һәлакәткә дучар булды.
6 Алар яман теләкләргә бирелде. Шундый яман теләкләрдән саклап, алар белән булган хәлләр безнең өчен сабак булды.
7 Шулай ук, кайберләре кебек, потка табынучылар булмагыз. Изге язмада алар хакында: «Халык ашарга һәм эчәргә утырды, ә аннан соң торып бастылар һәм күңел ачтылар», — дип язылган.
8 Кайберәүләр фәхешлек иткән кебек, фәхешлек итмик — бер көн эчендә аларның егерме өч меңе һәлак булды.
9 Кайберәүләр Мәсихне сынап караган кебек, без Аны сынамыйк — алар елан чагуыннан үлделәр.
10 Аларның кайберләре сукранган кебек, сез сукранмагыз — аларны һәлак итүче фәрештә үтерде.
11 Бу хәлләр башкаларга сабак булсын өчен эшләнелде, ә безгә, заманнарның ахыры якынлашкан вакытта яшәүчеләргә, кисәтү ясап язылды.
12 Менә шуңа күрә кем дә кем нык торам дип уйлый икән, егылмас өчен сак булсын.
13 Сез барлык кешеләргә хас булган сынауга гына дучар буласыз. Аллаһы Үз вәгъдәсенә турылыклы һәм Ул сез чыдый алмаслык сынауны рөхсәт итмәячәк. Сыналган вакытыгызда түзеп тору өчен, сезгә котылу юлын да күрсәтәчәк.
14 Шуңа күрә, сөеклеләрем, потларга табынудан качыгыз.
15 Мин сезгә акыллыларга сөйләгән кебек сөйлим. Сөйләгәннәрем турында үзегез уйлап карагыз.
16 Без рәхмәт белдергән шөкрана касәсе Мәсих канына катнашу түгелме? Без сындырып алган икмәк Мәсих тәненә катнашу түгелме?
17 Икмәк бер, һәм без, күп булсак та, бер тәнне тәшкил итәбез, чөнки бер икмәкне уртаклашабыз.
18 Исраил халкына карагыз: алар корбан итен ашаучылар, корбан китерү урынындагы гыйбадәттә катнашучылар түгелме?
19 Инде сезгә нәрсә әйтим? Пот та, потка китерелгән корбан да нинди дә булса әһәмияткә ияме?
20 Һич юк. Әмма мәҗүсиләр корбанны Аллаһыга түгел, бәлки җеннәргә китерәләр. Ә мин җеннәр белән аралашуыгызны теләмим.
21 Раббы касәсеннән дә, җеннәр касәсеннән дә эчә алмассыз. Бер үк вакытта Раббының да, җеннәрнең дә аш табынында катнашучылар була алмассыз.
22 Әллә без Раббының ачуын чыгарырга телибезме? Әллә без Аңардан да кодрәтлерәкме?
23 Һәрнәрсә рөхсәт ителә, әмма һәрнәрсә дә файдалы түгел. Һәрнәрсә рөхсәт ителә, әмма һәрнәрсә дә гыйбрәтле түгел.
24 Һичкем үзенә файдалыны түгел, бәлки башкаларга файдалы-ны эзләсен.
25 Ит базарында сатыла торганнарның барысын да ашагыз һәм, вөҗданыгыз тыныч булсын өчен, төпченеп тормагыз.
26 Чөнки Изге язмада язылганча: «Җир һәм җирдәге һәрнәрсә — Раббыныкы».
27 Әгәр иман итмәүче берәү сезне ашка чакыра һәм сез барырга телисез икән, вөҗданыгыз тыныч булсын өчен тәкъдим ителгән һәрнәрсәне төпченмичә ашагыз.
28 Ләкин берәү сезгә: «Бу — потка китерелгән корбан», — дисә, шул берәү һәм вөҗдан хакына ашамагыз.
29 Вөҗдан дигәннән, сезнекен түгел, бәлки шул кешенең вөҗданын күз алдында тотам. «Ни өчен әле азатлыгым башка вөҗдан белән чикләнергә тиеш?»
30 Әгәр мин ризыкны Аллаһыга рәхмәт әйтеп кабул итәм икән, бу ризык өчен нигә мине шелтәләргә?
31 Шулай итеп, ашыйсызмы, эчәсезме, яки башка берәр нәрсә эшлисезме — һәммәсен дә Аллаһы даны өчен эшләгез.
32 Яһүдләргә дә, грекларга да яисә Аллаһы бердәмлегенә дә абыну ташы булмагыз.
33 Мин дә үз файдама түгел, бәлки, күпләр котылсын өчен, алар файдасына һәркемгә һәрнәрсәдә ярарга тырышам бит.
1 Мин Мәсихтән үрнәк алган кебек, сез дә миннән үрнәк алыгыз.
2 Имандашлар, һәрнәрсәдә мине истә тотуыгыз һәм күрсәтмәләремне ничек биргән булсам, аларны шулай тотуыгыз өчен сезне мактыйм.
3 Моны белүегезне телим: һәр ирнең Башы — Мәсих, хатынның башы — ир, ә Мәсихнең Башы — Аллаһы.
4 Баш киеме киеп дога кылучы яки пәйгамбәрлек итүче һәр ир үзенең башын оятлы итә.
5 Баш киеме кимичә дога кылучы яки пәйгамбәрлек итүче һәр хатын үзенең башын оятлы итә, чөнки бу — хатынның чәче алдырылган булу белән бер дәрәҗәдә.
6 Чөнки хатын башына кияргә теләми икән, чәче кырылсын, ә инде чәче алынган яки кырылган булу аның өчен оятлы икән, ул чакта башына кисен.
7 Шулай итеп, ир кеше, Аллаһының чагылышы һәм даны булганга күрә, башына кияргә тиеш түгел; ә хатын — ирнең даны.
8 Чөнки ир — хатыннан түгел, бәлки хатын — ирдән,
9 һәм ир хатын өчен түгел, бәлки хатын ир өчен яратылган.
10 Шуңа күрә хатын башында үз өстеннән хакимлекне күрсәт-
кән билге
булырга тиеш. Бу — фәрештәләргә дә шуны күрсәтә.
11 Хәер, Раббы алдында ир хатыннан, хатын ирдән бәйсез түгел.
12 Чөнки хатын ирдән булган кебек, ир дә хатыннан туа. Ә һәрнәрсә — Аллаһыдан.
13 Үзегез фикер йөртегез: хатын кешегә башына кимичә Аллаһыга дога кылу килешерме?
14 Безне сәламәт акыл үзе үк өйрәтә: ир кешенең чәче озын икән, бу — аның өчен хурлык.
15 Әмма хатынның чәче озын икән, бу — аның өчен дан, чөнки чәч аңа каплавыч итеп бирелгән.
16 Әгәр кем дә булса бу хакта бәхәсләшергә тели икән, бездә дә, Аллаһы бердәмлекләрендә дә хатын-кызның башына кимәү гадәте юк.
17 Бирәчәк күрсәтмәләремдә сезне мактамыйм, чөнки сезнең җыелышларыгыз файдага караганда күбрәк зыян китерә.
18 Беренчедән, иман итүчеләр бердәмлеге җыелышларыгызда аерым бер төркемнәргә бүленүегез турында ишетәм һәм мин моңа берникадәр ышанам да.
19 Чөнки Аллаһы тарафыннан хупланган кешеләр билгеле булсын өчен фикерләрнең төрле булуы да кирәк.
20 Сез бергә җыелган вакыт, чыннан да, әле Раббының кичке ашын ашау дигән сүз түгел.
21 Чөнки һәркем үз ризыгын башкалардан элегрәк ашарга ашыга, шулай итеп, кайберәүләр ач кала, кайберәүләр исерә.
22 Ашарга һәм эчәргә сезнең өегез юкмы әллә? Әллә сез Аллаһы бердәмлеген санга сукмыйсызмы һәм мохтаҗларны кимсетәсезме? Нәрсә әйтергә сезгә? Моның өчен сезне мактаргамы? Юк, мактамыйм.
23 Чөнки сезгә биргән күрсәтмәләрне мин Раббының Үзеннән алдым. Раббы Гайсә хыянәткә дучар төнне кулына икмәк алды
24 һәм, шөкрана иткәннән соң, икмәкне сындырып болай диде: «Бу — сезнең өчен бирелгән тәнем; Мине искә алу өчен шулай эшләгез».
25 Шул рәвешчә, кичке аштан соң кулына касә алып әйтте: «Менә бу касә — Минем каным белән расланган яңа килешү. Моны эчкән саен, Мине искә алу өчен эчегез».
26 Чөнки бу икмәкне ашаган һәм бу касәдән эчкән саен, сез Раббы килгәнгә кадәр Аның үлемен игълан итәсез.
27 Шулай итеп, кем дә кем, бу йолага хөрмәт күрсәтмичә, икмәкне ашаса һәм Раббының касәсеннән эчсә, Аның тәне вә канына каршы гөнаһ кылуда гаепле булыр.
28 Кеше башта үзен-үзе сынарга тиеш, аннан соң гына бу икмәкне ашый һәм бу касәдән эчә ала.
29 Чөнки, кемдер Раббы тәненә әһәмият бирмичә ашый һәм эчә икән, ул шуның белән үзен-үзе хөкемгә дучар итә.
30 Менә шуңа күрә күбегез зәгыйфь һәм авыру, вафат булганнар да аз түгел.
31 Ә без үз-үзебезне тикшерсәк, ул чакта хөкем ителмәс идек.
32 Хөкем ителгәндә исә, дөнья белән бергә хөкем ителмәс өчен, Раббы безгә Үзе тәрбия бирә.
33 Шуңа күрә, имандашларым, кичке ашка җыелганда бер-берегезне көтегез.
34 Җыелуыгыз Аллаһы тарафыннан хөкем ителерлек булмасын өчен, ач кеше өендә ашасын. Ә башка нәрсәләр хакында яныгызга килгәч күрсәтмә бирермен.
1 Имандашлар, Изге Рухтан килгән сәләтләр хакында да белми калуыгызны теләмим.
2 Сез беләсез, мәҗүси вакытыгызда, үзегезне кемдер җитәкләп йөрткән сыман, телсез потларга табынырга йөрдегез.
3 Менә шуның өчен сезгә әйтәм: Аллаһы Рухы белән сөйләүче беркем дә: «Гайсәгә ләгънәт», — димәс, һәм бары Изге Рух аша гына: «Гайсә — Раббы», — дип әйтә алыр.
4 Изге Рух биргән сәләтләр төрле, әмма Рух бер үк.
5 Хезмәт итүнең күп төрләре бар, әмма Раббы бер үк.
6 Гамәлләр дә төрле, әмма һәммәсендә һәммә нәрсәне эш итүче — шул ук бер Аллаһы.
7 Ә һәрберебездә Рухның уртак файдага эш итүе күренә.
8 Берәүгә Рух аша хикмәт белән сөйләү осталыгы, икенчесенә шул ук Рух аркылы белем бирү осталыгы бирелә.
9 Башка берәүгә шул ук Рух тарафыннан иман бирелә, ә икенче берәүгә шул ук Рух тарафыннан дәвалау сәләте бирелә.
10 Берәүгә могҗиза күрсәтү, берәүгә пәйгамбәрлек итү[5], башка берәүгә төрле рухларны аера белү, кайберәүгә таныш булмаган төрле телләрдә[6]сөйләү, башкасына телләрне аңлата белү бирелә.
11 Боларның һәммәсен дә бер үк Рух эшли һәм һәркемгә сәләтне Үзе теләгәнчә бүлеп бирә.,
12 Мәсих — күп әгъзаларга ия булган тән кебек; тән күп әгъзалардан торса да, бер бөтен тәнне тәшкил итә.
13 Без һәммәбез дә: яһүдләр яки греклар, коллар яки иреклеләр, бер Рух белән чумдырылып, Мәсих тәненә кушылдык, һәм һәммәбезгә эчү өчен шул ук Рух бирелде.
14 Тән исә бер әгъзадан түгел, бәлки күп әгъзалардан тора.
15 Әгәр аяк: «Мин, кул булмаганга, тәннеке түгел», — дисә, чынлап та ул шуңа күрә генә тәннеке булмасмы?
16 Һәм колак: «Мин, күз булмаганга, тәннеке түгел», — дисә, чынлап та, шуңа күрә генә тәннең бер әгъзасы булмасмы?
17 Әгәр бөтен тән күздән генә торса, ничек ишетә алыр иде? Бөтен тән колактан гына торса, ис сизү тойгысы кайда булыр иде?
18 Әмма ләкин Аллаһы тәндә әгъзаларның һәрберсен Үзе теләгәнчә урнаштырган.
19 Әгәр инде барысы бер әгъза булса, тән кайда булыр иде?
20 Хәзер исә әгъзалар күп, әмма тән бер генә.
21 Күз кулга: «Миңа кирәгең юк», — дип, яки баш аякларга: «Сез миңа кирәк түгел», — дип әйтә алмас.
22 Киресенчә, тәннең зәгыйфьрәк күренгән әгъзалары бигрәк тә кирәк.
23 Тәннең аз хөрмәткә ия булып күренгән өлешләрен күбрәк хөрмәт итәбез. Килешсез саналган әгъзаларыбызны без аеруча тырышып каплыйбыз,
24-25 ә инде килешле әгъзаларыбызның моңа ихтыяҗы юк. Әмма тәндә аерымлык булмасын, бәлки барлык әгъзалар бер-берсе турында бер дәрәҗәдә кайгыртсыннар өчен, килешсез әгъзаларга күбрәк хөрмәт күрсәтеп, Аллаһы тәндә әгъзаларны үзара шулай тоташтырды.
25
26 Шуңа күрә бер әгъза җәфаланса, барлык әгъзалар да аның белән бергә җәфа чигә, бер әгъза хөрмәтләнсә, әгъзаларның һәммәсе дә аның белән бергә шатлана.
27 Сез — Мәсихнең тәне, ә аерым-аерым — шул ук тәннең әгъзалары.
28 Аллаһы Үз бердәмлегендә берәүләрне рәсүлләр, икенчеләрне пәйгамбәрләр, өченчеләрне өйрәтүчеләр итеп куйды. Аннары кайберәүләргә могҗизалар тудыру кодрәте, дәвалау, башкаларга ярдәм итү, идарә итү һәм таныш булмаган телләрдә сөйләү сәләте бирде.
29 Барысы да рәсүлләрме? Барысы да пәйгамбәрләрме? Барысы да өйрәтүчеләрме? Барысы да могҗиза тудыручылармы?
30 Һәммәсенең дә дәвалау сәләте бармы? Барысы да таныш булмаган телләрдә сөйлиме? Барысы да бу телләрне аңлата аламы?
31 Зуррак сәләтләргә ашкыныгыз. Мин сезгә иң яхшы юлны күрсәтермен.
1 Кешеләр һәм фәрештәләр теле белән сөйләшсәм дә, әгәр миндә мәхәббәт юк икән, ул чакта мин яңгыравык бакыр яки чыңлавык тәлинкә кебек кенә булыр идем.
2 Пәйгамбәрлек итү сәләтем булса да, барлык серләрне һәм һәртөрле гыйлемне белсәм дә, таулар күчерерлек иманым булса да, әгәр миндә мәхәббәт юк икән, мин берни булмас идем.
3 Бөтен мөлкәтемне өләшеп, тәнемне яндырырга тапшырсам да[7], әгәр мәхәббәт юк икән, миңа моннан бернинди дә файда булмас иде.
4 Мәхәббәт түземле, шәфкатьле, көнләшми, мактанмый, тәкәбберләнми,
5 дорфа түгел, үз файдасын эзләми, ярсымый, яман эшләрне истә тотмый.
6 Мәхәббәт ялганга сөенми, бәлки хакыйкатькә шатлана.
7 Ул барысына да түзә, бар нәрсәгә ышана, һәрнәрсәгә өметләнә һәм сабыр итә.
8 Пәйгамбәрлек итүләр тукталыр, телләр тынар һәм белем юкка чыгар, әмма мәхәббәт беркайчан да бетмәс.
9 Безнең белемебез дә, пәйгамбәрлек итүебез дә өлешчә генә бит.
10 Ә камил нәрсә килгәч, өлешчә генә булган нәрсә югалачак.
11 Мин бала чагында балаларча сөйләдем, балаларча уйладым, балаларча фикер йөрттем, ә инде үсеп җиткәч, бала вакыттагы эшләрне ташладым.
12 Хәзер без, тонык көзге аркылы карагандай, чагылыш кына күрәбез, ә инде ул вакытта, турыдан-туры йөзгә-йөз күрәчәкбез. Минем белемем хәзер өлешчә, ә инде ул вакытта, Аллаһы мине ничек тулы белә, мин дә тулысынча беләчәкмен.
13 Менә һәрвакыт булачак өч нәрсә: иман, өмет һәм мәхәббәт. Ә мәхәббәт аларның иң бөеге.
1 Мәхәббәтне максат итеп, Изге Рухтан килгән сәләтләргә, бигрәк тә пәйгамбәрлек итү сәләтенә ашкыныгыз.
2 Күктән бирелгән таныш булмаган телдә сөйләүче кешеләргә түгел, бәлки Аллаһыга сөйли. Чөнки аны һичкем аңламый, ул Изге Рух ярдәмендә серләр сөйли.
3 Пәйгамбәрлек итүче исә кешеләрне ныгыту, аларның рухларын күтәрү һәм алар юаныч тапсын өчен сөйли.
4 Таныш булмаган телдә сөйләүче үзен ныгыта, ә пәйгамбәрлек итүче — иман итүчеләр бердәмлеген ныгыта.
5 Мин шуны телим: сез барыгыз да таныш булмаган телләрдә сөйләгез, әмма тагын да яхшысы — пәйгамбәрлек итегез. Пәйгамбәрлек итүче таныш булмаган телләрдә сөйләүчедән өстенрәк, әгәр таныш булмаган телләрдә сөйләүче үз сүзләрен кешеләргә иман итүчеләр бердәмлеген нәсыйхәт итү өчен аңлата алмаса.
6 Имандашлар, хәзер яныгызга килеп, таныш булмаган телләрдә сөйлим, һәм сезгә Аллаһыдан ачылыш яки пәйгамбәрлек сүзе, яисә тәгълимат бирмим икән, ни файда китерермен сезгә?
7 Шуның кебек үк, сыбызгы яки курай кебек тавыш чыгаручы җансыз әйберләр бер-берсенә охшамаган көй чыгарма-салар, сез аларның көен танырсызмы?
8 Әгәр быргы аңлаешсызаваз чыгарса, сугышка кем әзерләнер?
9 Менә шулай сез дә телегез белән кеше төшенмәслек сүзләр әйтәсез икән, ничек сөйләгәнегезне аңларлармы? Сез җилгә генә сөйләгән булырсыз.
10 Дөньяда күп төрле телләр бар, һәм аларның һәрберсенең үз мәгънәсе бар.
11 Әгәр әйтелгән сүзнең мәгънәсен аңламасам, ул чакта мин сөйләүче өчен чит ил кешесе булган кебек, сөйләүче дә минем өчен чит ил кешесе кебек була.
12 Сезнең белән дә шулай ук: рухи сәләтләргә омтылып, иман итүчеләр бердәмлеген нәсыйхәт итәчәк сәләтләрне мул кулланырга тырышыгыз.
13 Шуңа күрә, таныш булмаган телдә сөйләүче аңлата белү өчен дога кылсын.
14 Чөнки мин таныш булмаган телдә догакылсам, рухым дога кыла, ә акылым анда катнашмый кала.
15 Нәрсә эшләргә соң? Рухым белән дога кылырмын, һәм акылым белән дә дога кылырмын, рухым белән данлап җырлармын, һәм акылым белән дә данлап җырлармын.
16 Югыйсә, рухың белән генә Аллаһыга шөкер иткәндә, синең әйткәнеңне аңламаучы гади кеше рәхмәт укуыңа ничек «амин» дип ризалыгын белдерер?
17 Син һичшиксез яхшы шөкер итәсең, әмма башка берәү моннан нәсыйхәт алмый.
18 Барыгызга караганда күбрәк телләрдә сөйләгәнем өчен Аллаһыма шөкер итәм.
19 Әмма иман итүчеләр бердәмлегендә таныш булмаган телдә ун мең сүз әйтүгә караганда, башкаларга да нәсыйхәт булсын өчен, акыл белән биш сүз әйтүне яхшырак дип саныйм.
20 Имандашлар! Уйларыгыз балаларныкы кебек булмасын. Яманлыкка карата балалар кебек, ә фикер йөртү рәвешегез белән балигъ булган кешеләр сыман булыгыз.
21 Канунда болай дип язылган: «Бу халыкка сәер телләрдә сөйләүче кешеләр аша, чит кешеләрнең авызлары белән сөйләрмен, — ди Раббы, — әмма ул чакта да мине тыңламаслар».
22 Димәк, таныш булмаган телләр — иманлылар өчен түгел, бәлки иман итмәүчеләр өчен билге. Пәйгамбәрлек итү исә иман итмәүчеләр өчен түгел, бәлки иманлылар өчен.
23 Шулай итеп, бөтен иман итүчеләр бердәмлеге бергә җыелып, һәммәсе таныш булмаган телләрдә сөйләгәндә сез сөйләгәнне аңламаучы гади кешеләр яки иман итмәүчеләр кереп, алар: «Сез тилерәсез», — димәсләрме?
24 Әмма барысы да пәйгамбәрлек иткәндә аңламаучы бер гади кеше яки иман итмәүче килеп керсә, ул, гаепләре өчен, барысы тарафыннан да фаш ителер, барысы тарафыннан да хөкем ителер;
25 шулай итеп, аның йөрәк серләре барысына ачылыр, һәм ул: «Чынлап та, Аллаһы сезнең белән», — дияр һәм сәҗдә кылып Аллаһыга табыныр.
26 Димәк, имандашлар, инде хәзер нәрсә? Сез бергә җыелган вакытта һәрберегезнең мәдхиясе, тәгълиматы, таныш булмаган телдә хәбәре, Аллаһыдан ачылышы, аңлатмасы бар. Болар исә һәммәсе дә бердәмлекне рухи яктан ныгыту өчен булсын.
27 Кем дә булса таныш булмаган телдә сөйли икән, берәү аңлатып торсын. Ә ике яки иң күбе өч кеше бер-бер артлы сөйли ала.
28 Аңлатучы булмаса, ул чакта бердәмлектә сөйләүче дәшмәсен, үзенә һәм Аллаһыга гына сөйләсен.
29 Пәйгамбәрләр дә икәү яки өчәү сөйләсеннәр, ә башкалар сөйләнелгән буенча фикер йөртеп, аларга бәя бирсен.
30 Җыелышта утыручылар арасыннан берәүгә Аллаһыдан ачылыш килсә, беренче сөйләүче аңа сүз әйтергә мөмкинлек бирсен.
31 Чөнки һәммәгез дә өйрәнсен, һәммәгез дә файда алсын өчен, бер-бер артлы пәйгамбәрлек итә аласыз.
32 Пәйгамбәрләрнең рухлары да пәйгамбәрләргә буйсына,
33 чөнки Аллаһы — тәртипсезлек Аллаһысы түгел, бәлки тынычлык Аллаһысы. Изгеләрнең барлык бердәмлекләрендәге кебек,
34 хатыннарыгыз бердәмлек җыелышларында дәшмәсеннәр, чөнки аларга анда сөйләргә рөхсәт ителми. Муса канунында әйтелгәнчә, алар буйсынучан булырга тиеш.
35 Алар нәрсә турында булса да белергә тели икән, өйләрендә ирләреннән сорасыннар. Чөнки хатыннар өчен бердәмлек җыелышында сөйләү хурлык санала.
36 Аллаһы сүзе сездән чыктымы әллә? Әллә сезгә генә ирештеме?
37 Үзен пәйгамбәр яки рухи яктан бик сәләтле дип исәпләгән кеше сезгә язганнарымның Раббы әмере икәнен танысын.
38 Әгәр танымаса, ул да танылмасын[8].
39 Шулай итеп, имандаш-лар, пәйгамбәрлек итәргә ашкыныгыз, әмма таныш булмаган телдә сөйләүне дә тыймагыз.
40 Тик һәрнәрсә тәртипле һәм килешле булырга тиеш.
1 Имандашлар, үзем сөйләгән Яхшы хәбәрне исегезгә төшереп китәм. Сез аны кабул иттегез һәм анда нык торасыз.
2 Мин игълан иткән Яхшы хәбәр сүзләрен тотсагыз, котыласыз. Югыйсә, юкка гына иман китергән булып чыгасыз.
3 Чөнки һәрнәрсәдән элек мин үзем кабул иткәнне сезгә тапшырдым, ә иң мөһиме: Мәсих, Изге язмада язылганча, безнең гөнаһларыбыз өчен үлде,
4 күмелде һәм, Изге язмада әйтелгәнчә, өченче көндә үледән терелтелде,
5 элек Кифаска, аннан соң унике рәсүлгә күренде.
6 Шуннан бер үк вакытта биш йөздән артык имандашка күренде. Аларның күбесе әлегә кадәр исән-сау, ә кайберләре инде үлде.
7 Шуннан соң Ул Ягъкубка, шулай ук барлык рәсүлләргә күренде.
8 Ә инде һәммәсеннән соң, мин «җитлекми туган бала» сыман булуга карамастан, миңа да күренде.
9 Чөнки мин - рәсүлләрнең иң әһәмиятсезе, һәм рәсүл дип аталырга лаеклы да түгелмен, чөнки Аллаһы бердәмлеген эзәрлекләдем.
10 Әмма хәзер мин кем булсам, Аллаһы мәрхәмәте белән булдым. Ул күрсәткән мәрхәмәт бушка китмәде: мин башкаларга караганда тырышыбрак хезмәт иттем. Хәер, мин түгел, бәлки минем белән булган Аллаһы мәрхәмәте хезмәт итте.
11 Шулай итеп, минме, алармы, без шуны игълан итәбез, һәм сез шуңа иман иттегез.
12 Мәсих үледән терелтелгән дип игълан ителгәч, ничек сезнең кайберләрегез, үлгәч терелү юк, дип сөйли ала соң?
13 Үледән терелү юк икән, Мәсих тә үледән терелтелмәгән булып чыга.
14 Әгәр Мәсих терелеп тормаган икән, безнең хәбәребез дә, сезнең иманыгыз да буш була.
15 Моннан тыш без Аллаһы хакында да ялган шаһитләр булыр идек, чөнки, Ул Мәсихне үледән терелтеп торгызды, дип шаһитлек иттек. Хәлбуки, үлеләрнең терелүе булмагач, Аллаһы Мәсихне дә терелтеп торгызмаган булып чыга.
16 Чөнки, үлеләр терелтелми икән, Мәсих тә үледән терелтелмәгән була.
17 Әгәр Мәсих терелеп тормаган икән, иманыгыз - буш, сез әле дә үз гөнаһларыгыз белән бергә.
18 Бу инде - Мәсихкә иман итеп үлгәннәр дә һәлак булдылар дигән сүз.
19 Мәсихкә бу тормышта гына өмет багласак, без барлык кешеләргә караганда да кызганычрак.
20 Әмма ләкин чыннан да Мәсих үлеләр арасыннан беренче булып терелеп торды.
21 Чөнки, үлем кеше аша килгән кебек, үледән терелеп тору да бер Кеше аша килде.
22 Адәм аркасында һәммәсе үлгән кебек, Мәсих бәрабәренә һәммәсе яңадан тереләчәк.
23 һәркем үз чиратында: беренче булып Мәсих, соңыннан, Ул килгәндә, Аныкылар тереләчәк.
24 Шуннан соң ахыры килер, Ул, һәртөрле җитәкчелекне, хакимиятне, кодрәтне юкка чыгарып, Патшалыкны Ата-Аллаһыга тапшырачак.
25 Чөнки барлык дошманнарын Үз аягы астына салганга кадәр Мәсих патшалык итәргә тиеш.
26 һәм соңгы дошман - үлем юкка чыгарылачак.
27 Чөнки Изге язмада әйтелгәнчә, «Аллаһы һәрнәрсәне Аның аягы астына салып буйсындырды». һәрнәрсә Мәсих- кә буйсындырылды диелгән икән, аңлашыла ки, һәрнәрсәне Аңа Буйсындыручы Аллаһыдан башка буйсындырылды.
28 Ә инде һәрнәрсәне Мәсихкә буйсындыргач, Угыл Үзе дә һәрнәрсәне Аңа Буйсындыручыга буйсыначак, шулай итеп, Аллаһы һәммә нәрсәдә бар нәрсә булачак.
29 Югыйсә, ник үлеләр өчен суга чумдырылу йоласын үтиләр? Үлеләр бөтенләй терелеп тормагач, ник үлеләр өчен моны эшлиләр?
30 Ни өчен без үзебез һәрвакыт куркыныч астында торабыз?
31 Мин һәр көн үлем белән йөзгә-йөз очрашам. Иман- дашлар, бу турыда сезнең өчен кичергән горурлыгым белән Раббыбыз Мәсих Гайсә алдында ант итәм.
32 Гади кешеләр кебек уйлаганда, үлеләр терелтелмәсә, Эфестә ерткычлар белән көрәшүемнән миңа ни файда? Үлеләр терелтелмәсә, «ашыйк, эчик, чөнки иртәгә үләчәкбез!»
33 Алданмагыз: «азгын кешеләр белән аралашу яхшы әхлакны боза».
34 Кирәгенчә айныгыз һәм гөнаһ кылмагыз. Чөнки сезгә оят булсын өчен әйтәм: кайберләрегез Аллаһыны белми.
35 Кем дә булса: «Үлеләр ничек терелеп торачаклар? һәм аларның тәне нинди булыр?» - дип сорый ала.
36 Әй акылсыз! Син чәчкән нәрсә, башта үлмәсә, терелмәячәк.
37 Син, чәчкәндә, булачак үсемлекнең үзен түгел, бәлки бер орлыкны - бодай яки нинди дә булса башка орлыкны чәчәсең.
38 Әмма Аллаһы аңа ничек теләсә, шундый тән бирә, һәр орлыкка үз тәнен бирә.
39 һәр тән бертөрле түгел. Кешеләрнең тәне башка, хайваннарныкы башка, балыкларның, кошларның да тәне башка.
40 Күктәге җисемнәр дә, җирдәге җисемнәр дә бар, әмма күктәге җисемнәрнең гүзәллеге җирдәге җисемнәрнекеннән аерыла.
41 Кояшның да, айның да, йолдызларның да җемелдәүләре башка. Йолдызлар да үзара җемелдәүләре ягыннан бер-берсеннән аерыла.
42 Үлеләр терелеп торганда да шулай булачак. Тән чери торган булып күмелә, ә мәңге үлми торган булып терелтелә.
43 Кимсетелеп күмелә, данланып терелеп тора. Зәгыйфь килеш күмелә, көчле булып терелеп тора.
44 Канлы тән күмелә, рухи тән[9]терелеп тора. Канлы тән бар икән, рухи тән дә бар.
45 Изге язмада болай дип язылган: «Беренче кеше - Адәм - тере җан иясе булды»; ә соңгы Адәм - тормыш бирүче Рух.
46 Әмма беренче булып рухи түгел, бәлки канлы тәннән торган килде, аннан соң гына рухи килде.
47 Беренче кеше туфрак белән яратылды, ул - җирдән. Икенче Кеше - күктән.
48 Җирнекеләр туфрак белән яратылган кеше кебек, күкнекеләр күктән булган Кеше кебек.
49 Без хәзер туфрак белән яратылган кешенең кыяфәтен йөрткән кебек, киләчәктә күктән булган Кешенең кыяфәтен йөртәчәкбез.
50 Имандашлар, шуны да әйтим: тән һәм каннан торганнар Аллаһы Патшалыгына ия була алмас, һәм фани да мәңгелеккә ия була алмас.
51-52 Серне әйтәм сезгә: без барыбыз да үлмәячәкбез, әмма быргының соңгы тавышы яңгыраганда кинәт, күз ачып йомганчы, һәммәбез үзгәртеләчәкбез. Чөнки быргы кычкырганда үлеләр мәңге үлми торган булып терелеп торачаклар, һәм без үзгәртеләчәкбез.
53 Димәк, фани булган - мәңгелек булганга, һәм үләчәк нәрсә үлемсез нәрсәгә үзгәрергә тиеш.
54 Фани булган мәңгелек булганга үзгәргәч, һәм үләчәк нәрсә
үлемсез
нәрсәгә үзгәргәч: «Үлем җиңү белән йотылачак»;
55 «Үлем! Синең җиңүең кайда? Үлем! Синең угың кайда?» - дип,
Изге язмада
язылган сүзләр тормышка ашар.
56Үлемнең угы
исә - гөнаһ; ә инде гөнаһның көче - канун.
57 Раббыбыз Гайсә
Мәсих аша безгә җиңү биргән Аллаһыга рәхмәт яусын!
58 Сөекле имандашларым, менә шуның өчен нык торыгыз һәм какшамас булыгыз. Күрсәткән хезмәтегезнең Раббы алдында бушка булмаячагын белеп, һәрвакыт Аның эшен бар көчегезне куеп башкарыгыз.
1 Изгеләр өчен җыела торган иганәгә килгәндә, мин Гә-ләтиядәге иман итүчеләр бердәмлекләренә нинди күрсәтмә биргән булсам, сез дә шул рәвешчә эшләгез.
2 Мин яныгызга килгәч, сез иганә җыеп йөрмәс өчен, сезнең һәрберегез атнаның беренче көнендә, хәленә күрә, табышының бер өлешен аерып куйсын һәм сакласын.
3 Яныгызга килгәч, иганәгезне тапшыру өчен сез сайлаячак кешеләрне хатлар белән Иерусалимга җибәрермен.
4 Миңа бару килешле булса, алар минем белән барырлар.
5 Македуния аша йөргәч, мин яныгызга килермен; чөнки мин Македуния аша барырмын.
6 Бәлки, беркадәр сезнең янда яшәрмен, яки, хәтта, кышны да үткәрермен, һәм шулай итеп, кая барсам да, мине озатып йөри алырсыз.
7 Чөнки хәзер сезнең белән аз гына вакытка күрешергә теләмим, бәлки, Раббы насыйп итсә, беркадәр вакыт яныгызда булырга өмет итәм.
8 Эфестә исә Илленче көн бәйрәменә кадәр калырмын,
9 чөнки анда, дошманнар күп булуга да карамастан, нәтиҗәле хезмәт итү өчен ишекләр киң ачылды миңа.
10 Тимуте яныгызга килсә, карагыз аны, бернәрсәгә борчылмасын, чөнки ул да минем кебек Раббы эшләрен башкара.
11 Шуның өчен һичкем аңа илтифатсыз булмасын, бәлки аны минем яныма иминлек белән озатыгыз. Мин аны имандашлар белән бергә көтәм.
12 Апуллус туганга килгәндә исә, мин аннан имандашлар бе-
лән бергә
яныгызга баруын бик нык үтендем. Әмма хәзергә ул
сезнең янга барырга теләми,
ләкин уңай вакыт табуга барыр.
13Иманда торыгыз, уяу, кыю һәм нык булыгыз.
14 һәрнәрсәне яратып башкарыгыз.
15 Имандашлар, минем сезгә бер үтенечем бар. Сез Эстефәнәс гаиләсен беләсез, ул Ахаядә беренчеләрдән булып Мәсихкә иман китерде, һәм алар үзләрен изгеләргә хезмәт итүгә багышладылар;
16 үзегезне шундыйларга, безнең белән бергә хезмәт күрсәтүчеләргә һәм авыр хезмәт башкаручыларга буйсындырыгыз.
17 Мин Эстефәнәснең, Фөртүнәтнең һәм Әхәйкнең килеп җитүенә шатмын: алар, сез юк чакта, җитешмәгән нәрсәләр белән мине тәэмин иттеләр.
18 Чөнки алар минем һәм сезнең рухыгызны тынычландырдылар. Мондыйлар хөрмәт ителүгә лаек.
19 Асия өлкәсендәге иман итүчеләр бердәмлекләре сезне сәламли. Өйләрендәге иман итүчеләр бердәмлекләре белән бергә Әкүл һәм Прискиллә сезгә Раббы исеме белән кайнар сәлам тапшыра.
20 Мондагы барлык имандашлар сезгә сәлам җибәрәләр. Бер-берегезне изге үбү белән сәламләгез.
21 Мин, Паул, үз кулым белән язып сезгә сәлам җибәрәм.
22 Кем Раббыны яратмый, аңа каһәр төшсен. «Марана та -Раббы, кил инде!»
23 Раббы Гайсәнең мәрхәмәте сезнең белән булсын.
24 Сезбарыгыз да Мәсих Гайсәнеке. Минем мәхәббәтем сезнең барыгыз белән бергә булсын.